ಹೊಸ ವರ್ಷದ ಬಗ್ಗೆ ಮಾತನಾಡುವಾಗ ತಾರಾಫಲ ಹೇಗಿದೆ ಎಂದು ಹೇಳುವುದು ಸಹಜ.  ಆದರೆ ಭೂಮಿ ಮೇಲಿನ ತಾರೆಗಳೆಂದರೆ ಸಿನಿಮಾರಂಗದವರು. ಅವರು 2020ರಲ್ಲಿ ತಮ್ಮ ಭವಿಷ್ಯವನ್ನು ಹೇಗೆ  ರೂಪಿಸಲು ಬಯಸುತ್ತಾರೆ ಎನ್ನುವ ಕುತೂಹಲ ಸಿನಿಪ್ರಿಯರಿಗೆ ಸಹಜ. ಆ ಬಗ್ಗೆ ತಮ್ಮ ಕನಸುಗಳನ್ನು ಒಂದಷ್ಟು ಮಂದಿ ತಾರೆಯರು ಇಲ್ಲಿ ಪಾಸಿಟಿವ್ ಪಿಕ್ಚರ್ ಜತೆಗೆ ಹಂಚಿಕೊಂಡಿದ್ದಾರೆ.

ಇವತ್ತು ನಾನು ನನ್ನ ಮಗ ಯಂಗ್ ಸ್ಟರ್ಸ್ ಎಲ್ಲ ಸೇರಿ ನನ್ನ ಅಣ್ಣನ ಮನೆಯಲ್ಲಿ ಒಂದು ಪಾರ್ಟಿ ಅರೇಂಜ್ ಮಾಡಿದ್ದಾರೆ. ಅಲ್ಲಿ ಸುಮಾರು 40 ಜನ ಸೇರುತ್ತೇವೆ. ಅದೇ ರೀತಿ ತುಂಬ ಸ್ನೇಹಿತರ ಮನೆಯಲ್ಲಿ ಪಾರ್ಟಿ ನಡೆಯುತ್ತಿದೆ. ಎಲ್ಲರೂ ಕರೆಯುತ್ತಿದ್ದಾರೆ ಎಲ್ಲೆಲ್ಲಿ ಸಾಧ್ಯವೋ ಅಲ್ಲೆಲ್ಲ ಒಮ್ಮೆ ಹೋಗಿ, ಒಂದೈದು ನಿಮಿಷ ತಲೆ ತೋರಿಸೋಣ ಅಂತ ಇದೀನಿ.

ಇನ್ನು ಹೊಸ  ವರ್ಷದ ಯೋಜನೆಗಳ ಬಗ್ಗೆ ಹೇಳುವುದಾದರೆ ನಾನು ಎರಡು ವರ್ಷಗಳಿಂದ ಮಾಡುತ್ತಿರುವ ಚಿತ್ರಗಳೆಲ್ಲ ಬಿಡುಗಡೆಯಾಗಲಿದೆ. ಮೊದಲನೆಯದಾಗಿ ನಾನೇ ಆ್ಯಕ್ಟ್ ಮಾಡಿ ನಿರ್ದೇಶಿಸಿರುವಂಥ 100 ಸಿನಿಮಾ ತೆರೆಗೆ ಬರಲಿದೆ. ಆಮೇಲೆ ಆಕಾಶ್ ನಿರ್ದೇಶನದಲ್ಲಿರುವ `ಶಿವಾಜಿ ಸುರತ್ಕಲ್’ ಚಿತ್ರ ಬಿಡುಗಡೆಯಾಗುತ್ತದೆ. ಶ್ರೀಜಯ್ ನಿರ್ದೇಶನದ ಭೈರಾದೇವಿ ಕೂಡ ಬಿಡುಗಡೆಯಾಗಬೇಕಿದೆ. ಇದರ ಪ್ರಚಾರ ಮತ್ತು ಬಿಡುಗಡೆಯಲ್ಲಿ ಮೂರು ತಿಂಗಳು ಕಳೆದುಹೋಗಿ ಬಿಡುತ್ತದೆ. ಆಮೇಲೆ ನನ್ನ ಟಾಕ್ ಶೋ ಶುರುವಾಗುತ್ತದೆ. ಜತೆಗೆ ನಂದಿನಿ ಧಾರಾವಾಹಿಯ ಪ್ರೊಡಕ್ಷನ್ ನಡೆಯುತ್ತಿದೆ. ಅದರ ಕಡೆಗೂ ಗಮನ ಕೊಡಬೇಕು. ಮತ್ತೆ ಎಲ್ಲ ವರ್ಷಗಳಂತೆ  ಹೊಸ ಸಿನಿಮಾಗಳ ಮಾತುಕತೆ ನಡೆಯುತ್ತಿದೆ. ಅವುಗಳು ಸದ್ಯದಲ್ಲೇ ಸೆಟ್ಟೇರಲಿದೆ.

ರಮೇಶ್ ಅರವಿಂದ್, ಚಿತ್ರನಟ- ನಿರ್ದೇಶಕ