ಕಷ್ಟಗಳನ್ನೆಲ್ಲ ದಾಟಿ ಬಂದು ಕಲಾವಿದನಾದ ಯಶ್ ಶೆಟ್ಟಿ

ಹೆಸರೇ ಸೂಚಿಸುವಂತೆ ಯಶ್ ಶೆಟ್ಟಿ ಕರಾವಳಿಯವರು. ಉಡುಪಿ ಜಿಲ್ಲೆಯ ಹಿರಿಯಡ್ಕದ ಹುಡುಗ. ಬಾಲ್ಯದಲ್ಲಿಯೇ ತಂದೆಯನ್ನು ಕಳೆದುಕೊಂಡರು. ಹೋಟೆಲ್ ನಲ್ಲಿ ಕ್ಲೀನಿಂಗ್ ಕೆಲಸ ಮಾಡಿ, ಬಳಿಕ ಸಪ್ಲಯರ್ ಆಗಿ ಆನಂತರ ಕ್ಯಾಶಿಯರ್ ಸ್ಥಾನ ಸೇರಿಕೊಂಡವರು! ಅಷ್ಟೇ ಅಲ್ಲ ಈ ಪಯಣದಲ್ಲಿ ಅವರು ರಾತ್ರಿ ಲಾಡ್ಜ್‌‌ನಲ್ಲಿ ರೂಂ ಬಾಯ್, ಬೆಳಗ್ಗಿನ ಜಾವ ಹಾಲು ಮಾರುವ ಕಾಯಕ, ಆನಂತರ ಶಾಲೆ.. ಹೀಗೆ ಬದುಕು ರೂಪಿಸಿಕೊಂಡ ಹುಡುಗ! ಕೊನೆಗೆ ಇದೀಗ ಬೆಂಗಳೂರು ಸೇರಿಕೊಂಡು ಪ್ರಮುಖ ಸಿನಿಮಾ ಕಲಾವಿದರ ಪಟ್ಟಿಯಲ್ಲಿ ಒಂದು ಸ್ಥಾನವನ್ನು ಗಿಟ್ಟಿಸಿದ್ದಾರೆ.

 

ರಂಗಭೂಮಿಯ ಪ್ರತಿಭೆ

ಯಶ್ ಶೆಟ್ಟರ ಮೂಲ ಹೆಸರು ಯಶವಂತ್ ಶೆಟ್ಟಿ. ಈ ಎಲ್ಲ ಬವಣೆಗಳ ನಡುವೆಯೂ ಹಿರಿಯಡ್ಕದ ಎಂಜಿಎಂ ಕಾಲೇಜಿನಲ್ಲಿ ಡಿಗ್ರಿ ಮಾಡಿದ್ದಾರೆ. ಊರಲ್ಲಿ ಒಂದಿಷ್ಟು ಹುಡುಗರು ಸೇರಿಕೊಂಡು ನಾಟಕದ ತಂಡವನ್ನು ಕಟ್ಟಿಕೊಂಡು ಯಕ್ಷಗಾನ, ನಾಟಕಗಳನ್ನು ಪ್ರದರ್ಶಿಸಿದ್ದೇ ಆರಂಭದ ಕಲೆಯ ನಂಟು. ಬಳಿಕ ನೀನಾಸಂ ಸಂಸ್ಥೆಯಿಂದ ನಟನೆ ಕಲಿಯುವ ಆಸಕ್ತಿ ಮೂಡಿತು. ಕಾಲೇಜಿನ ಶಿಕ್ಷಕರೇ ಒಂದಿಷ್ಟು ಹಣ ಸಂಗ್ರಹಿಸಿ ಯಶ್‌ನನ್ನು ನೀನಾಸಂಗೆ ಕಳುಹಿಸಿ ಕೊಟ್ಟರು. ಇಲ್ಲಿ ಒಂದು ವರ್ಷ ತರಬೇತಿ ಮುಗಿಸಿಕೊಂಡ ಮೇಲೆ ಎನ್.ಎಸ್.ಡಿ.ಬಗ್ಗೆ ತಿಳಿದುಕೊಂಡರು. ಅಲ್ಲಿಯೂ ನಟನೆ  ಕಲಿತರು. ಆ ಮೂರು ವರ್ಷಗಳಲ್ಲಿ ನಸೀರುದ್ದೀನ್ ಶಾ, ರಾಜ್‌ಪಾಲ್ ಯಾದವ್, ಅತುಲ್ ಕುಲಕರ್ಣಿ ಮೊದಲಾದ ಸೀನಿಯರ್‌ಗಳಿಂದ ಕಲಿಯುವ ಅವಕಾಶ ಲಭಿಸಿತು. ತರಬೇತಿ ಆದ ಮೇಲೆ ಏಷ್ಯನ್ ಎಜುಕೇಷನ್ ಥಿಯೇಟರ್ ಸೆಂಟರ್ ಹೆಸರಿನಲ್ಲಿ ಚೈನಾದಲ್ಲಿ ನಡೆಯುವ ಏಷ್ಯಾದ ಎಲ್ಲಾ ದೇಶಗಳ ನಡುವಿನ ಸ್ಪರ್ಧೆಯಲ್ಲಿ ಅತ್ಯುತ್ತಮ ನಟ ಪ್ರಶಸ್ತಿ ಪಡೆದರು! ಪ್ರಶಸ್ತಿ ಸ್ವೀಕರಿಸಿದ ಬಳಿಕ ಎನ್ ಎಸ್ ಡಿಯಲ್ಲಿಯೇ ನಟನೆಯ ಪಾಠ ಹೇಳಿಕೊಡುವ ಹುದ್ದೆ ಆಫರ್ ಮಾಡಿದರು.  ಆದರೆ ಒಪ್ಪದ ಯಶ್ ಮುಂಬೈಗೆ  ಹೋದರು. ಹೀಗೆ ಎನ್ ಎಸ್ ಡಿ ಇವರನ್ನು ಕಲಾವಿದನನ್ನಾಗಿ ಮಾಡಿತು.

 

ಕೂಡ್ಲು ರಾಮಕೃಷ್ಣ ನಿರ್ದೇಶನದ ‘ಮಕ್ಕಳೇ ಮಾಣಿಕ್ಯ’ ಹಾಗೂ ದಿನೇಶ್ ಬಾಬು ನಿರ್ದೇಶನದ ‘ಸ್ವಾತಿಮುತ್ತು’ ಧಾರಾವಾಹಿಗೆ ಸಹಾಯಕ ನಿರ್ದೇಶಕನಾಗಿ ಕೆಲಸ ಮಾಡಿದ ಅನುಭವ ಇವರಿಗೆ ಇದೆ. ಅಲ್ಲಿ ಪರಿಚಯವಾದ ಅಂಬರೀಶ್ ಎನ್ನುವವರು ನೀಡಿದ ‘ಜ್ವಲಂತಂ’ ಚಿತ್ರದ ಘೋರನ ಪಾತ್ರ ಇವರನ್ನು ಚಿತ್ರರಂಗದಲ್ಲಿ ಗುರುತಿಸಿಕೊಳ್ಳುವಂತೆ ಮಾಡಿತು. ಹಾಗಾಗಿ ಸೋಜಿಗ, ಅಭಿಸಾರಿಕೆ, ಚೌಕ , ನೂರೊಂದು ನೆನಪು, ಜಾನ್ ಜಾನಿ ಜನಾರ್ದನ್, ರೈಲ್ವೇ ಚಿಲ್ಡ್ರನ್, ಸಂಹಾರ, ಅಥರ್ವ, ಇತ್ತೀಚೆಗೆ ದರ್ಶನ್ ಅವರ ಯಜಮಾನದ ತನಕ ತಂದು ನಿಲ್ಲಿಸಿದೆ. ನಿರೂಪ್ ಭಂಡಾರಿ ಜೊತೆ ಚಿತ್ರ ಮತ್ತು ಯಜಮಾನ ಚಿತ್ರದಲ್ಲಿ ದರ್ಶನ್ ಮುಂದೆ ಫೈಟ್ ಮಾಡಿದ್ದು...ಹೀಗೆ ಹೊಸ ಅನುಭವಗಳ ಬಗ್ಗೆ ಹೇಳುವಾಗ ಯಶ್ ಶೆಟ್ಟಿಯ ಉತ್ಸಾಹ ನೂರ್ಮಡಿಯಾಗುತ್ತದೆ. ಇತ್ತೀಚೆಗೆ ತಮಿಳು ಚಿತ್ರವೊಂದರಲ್ಲಿಯೂ ಅವಕಾಶ ಪಡೆದುಕೊಂಡಿದ್ದಾರೆ.

​
 

 

 

 

 

 

 

 

 

 

 

 

 

 

 

 

 

 

 

 

​